سفیر روسیه در تاجیکستان اظهارداشت حکومت طالبان هنوز قادر به تامین امنیت مرزهای افغانستان نیست و بارها در سال جاری میلادی افراط‌گرایان برای نفوذ به تاجیکستان تلاش کردند.
به گزارش دفتر منطقه‌ای خبرگزاری تسنیم، «سمیون گریگوریف» سفیر روسیه در تاجیکستان در گفتگو با «تاس» اعلام کرد افراط گرایان در سال 2023 بارها تلاش کردند از افغانستان به تاجیکستان نفوذ کنند اما موفق نشدند.
وی افزود حکومت طالبان هنوز قادر به تامین امنیت مرزهای افغانستان نیست.
گریگوریف گفت روسیه تمام تلاش خود را برای جلوگیری و مهار حملات مرگبار به متحدانش از جمله تاجیکستان انجام خواهد داد.
سفیر روسیه در تاجیکستان تصریح کرد: «ما هیچ پیشرفت خاصی را در وعده‌های طالبان در بخش تامین امنیت کشورهای همسایه افغانستان نمی‌بینیم».
وی همچنین نسبت به وضعیت حقوق‌بشری و افزایش سطح بیکاری و فقر در افغانستان ابراز نگرانی کرد و گفت: سیاست‌های اشتباه طالبان سبب انزوای افغانستان شده است.
گریگوریف با ابراز نگرانی از اخراج پناهجویان افغان از پاکستان نیز اظهارداشت تاجیکستان و روسیه می‌کوشند از نفوذ افرادی تحت عنوان پناهجو به افغانستان جلوگیری کنند.
روسیه ماه گذشته میزبان نشستی با حضور چهره‌های سیاسی مخالفان طالبان بود که در آن درباره تشکیل حکومت فراگیر، مبارزه همسایگان افغانستان علیه تهدیدها و ایجاد ثبات منطقه‌ای، مبارزه با تروریسم و مواد مخدر گفتگو شد.